شرح ما بين السطور في السياحة والسفر او بمعنى ادق .... خبايا السياحة والسفر .... معلومات مش موجودة على النت ، حاجات كدة من نوعية .... " هو انا تأشيرتي لليونان اترفضت ليه .... " او " انا كل لما أقدم على تأشيرة الامارات اترفض رغم انى مروحتش هناك خالص قبل كدة" .... او " هو انا بعمل ايه اول ما انزل من الطيارة في ميونخ" .... او "انا معاى تأشيرة أمريكا بس هتخلص بعد أسبوع , ينفع اجددها و لا اعمل واحدة من اول و جديد " .... او واحد يقولك " هي الحاجات اللي بشتريها من السوق الحرة بتدخل في الوزن على الطيارة ولا لاء" .... وكمان حد يقولك "انا قدمت ملف جامد جدا لسفارة إيطاليا، يعنى كشف حساب كبير جدا، وسجل تجارى و باسبور في سفريات كثيرة، بس برضوا اخدت رفض" .... او واحد تانى يقولك "انا عاوز اروح كل المزارات في فرنسا لوحدي علشان اوفر، و هاستخدم جوجل مابس , بس الرومينج باتع الموبيل هيخرب بيتي "
كل الحاجات والإجابات على الأسئلة دي واكتر هتلاقيها هنا. والمعلومات دي نتيجة خبرات وتجارب حقيقية بعيدة عن الهرى الكتير اللي موجود ع النت .... اه .... ونسيت اقولكم .... هنشرح برضوا ازى تعمل سياحة وسفر لوحدك من غير حتى ما تروح لشركة سياحة وبأفضل الأسعار ... بس برضوا وللأمانة .... لازم نوضح ايه مخاطر الموضوع دة ومين بالضبط اللي يقدر يطبقه ويستفاد منه .... ليه بقي !!!! علشان في حاجات وأسعار كتيرة تبدوا لك انها ... يا سلام. مفيش بعد كدة .... دى أسعار ولا في الخيال يالا نحجز.... وهوب! ... وبعد ما تكون حجزت ودفعت يقولك " لاء معليش حضرتك التذكرة بدون وزن ولازم تدفع وزن 10 دولار على الكيلو، واحنا قولنا دة لحضرتك وانت بتحجز وحتى كتبينه "بالحبر السري" وانت ماخدتش بالك “.... او بعد ما تحجز الاوتيل وبسعر جنان .... تروح بقي تستلم الغرفة وانت بقي زي الباشا ماشى مع البلمان رايح على الاسانسير وبتدوس على الزورار فالبلمان يقولك " لاء يا فندم، احنا مش طالعين فوق، احنا هنزل من السلام اللى جانب الاسانسير ده .... علشان حجز حضرتك في غرفة " سلم فيو" .... او لاء معليش حضرتك انت حجزك غرفة "اندرجروند " ويقولها لك بالإنجليزي، قال يعنى الواد بيقول حقي وحقك ... فانت طبعا تقوله انا مش هاقعد في الاوضة دي فيقولك تمام يا فندم فرق السعر $$$$فاحنا علشان نتجنب المواقف دي ومندفعش اكتر بكتير من اللي كان معروض علينا من شركة السياحة واحنا اتفلحصنا .... هنوضح لحضرتكم امتى تشترى سياحة من النت وامتى تشترى من وكيل سياحي
No comments:
Post a Comment